Hüquqinfo.az bildirir ki,
Moldovanın hava məkanı Rusiyanın Ukraynaya qarşı həyata keçirdiyi kütləvi hücumlar fonunda 4 pilotsuz uçuş aparatı (PUA) tərəfindən pozulub.
Təhlükəsizlik məqsədilə Moldovanın şimalındakı hava məkanı müvəqqəti bağlanıb. Hava məkanı daha sonra yenidən açılıb.
Bundan əlavə, Şoldaneşti rayonunun Vadul Raşkov kəndi sakini partlayışa bənzər güclü səslər eşitdiyini bildirib. İlkin məlumata görə, partlayışın Dnestryanı bölgənin sol sahilində yerləşən Kamensk ərazisində baş verdiyi ehtimal olunub.
Daha sonra Floreşti rayonunun Çernitsa kəndi yaxınlığında da partlayış barədə məlumat daxil olub. Moldova polisi partlayışın yerini müəyyən edib. Hadisənin fermaya bitişik ərazidə yerləşən tarlada baş verdiyi bildirilib.
İlkin məlumata görə, hadisə nəticəsində ölən və xəsarət alan olmayıb. Hadisə yerində polis və digər ixtisaslaşmış qurumların əməkdaşları araşdırma aparır. Ərazidə drona aid ola biləcək qalıqlar da aşkarlanıb.
Moldova hakimiyyəti vətəndaşlara yerdə aşkar etdikləri naməlum və ya şübhəli obyektlərə yaxınlaşmamaq və belə hallar barədə dərhal aidiyyəti qurumlara məlumat vermək çağırışı edib.
