Ceyhun Bayramov Nyu-Yorkda TDT iclasına sədrlik etdi

Hüquqinfo.az bildirir ki,

Xarici işlər naziri Ceyhun Bayramov BMT Baş Assambleyasının 81-ci sessiyası (UNGA81) çərçivəsində Türk Dövlətləri Təşkilatının (TDT) Xarici İşlər Nazirləri Şurasının qeyri-rəsmi iclasına sədrliyi həyata keçirib və geniş nitqlə çıxış edib.

“Hüquqinfo.az” xəbər verir ki, bu barədə Azərbaycan Xarici İşlər Nazirliyinin rəsmi “X” hesabında məlumat verilib.

Nazir Ceyhun Bayramov çıxışında müştərək köklər və zəngin tarixə söykənən Türk dövlətləri arasında dərinləşən birliyi xüsusi vurğulayıb. O, qlobal miqyasda sürətlə dəyişən çağırışlar fonunda çoxşaxəli tərəfdaşlığın möhkəmləndirilməsinin strateji bir zərurət olduğunu diqqətə çatdırıb.

C. Bayramov Qəbələ Sammitində qəbul edilmiş qərarlar və təşəbbüslərdən sonra Azərbaycanın Təşkilatda sədrliyi dövründə əldə olunan mühüm nailiyyətləri ətraflı şəkildə nəzərə çatdırıb. Nazir Azərbaycanda təşkil olunan tədbirlərdə fəal iştirak etdiklərinə görə üzv dövlətlərə təşəkkürünü bildirib. Çıxışda Türk xalqlarının dili, tarixi və mədəni irsinin öyrənilməsinə əvəzsiz töhfə verən Birinci Türkoloji Qurultayın 100 illiyinə həsr olunmuş tədbirlər xüsusi mərhələ kimi qiymətləndirilib.

Bununla yanaşı, Bakıda TDT-yə üzv ölkələrin Təhlükəsizlik Şuralarının katibləri, Müsəlman Dini İdarələri Rəhbərləri Şurası və aparıcı milli analitik mərkəzlərin iştirakı ilə keçirilən son görüşlərin əməkdaşlıq gündəliyinin miqyasını aydın göstərdiyi vurğulanıb.

TDT-nin beynəlxalq nüfuzunun artırılmasının vacibliyini qeyd edən Ceyhun Bayramov, Təşkilatın BMT Baş Assambleyasında müşahidəçi statusu almasının ümumi və əsas hədəflərdən biri olduğunu bildirib.

XİN rəhbəri Türk coğrafiyasında nəqliyyat əlaqələrinin və tranzit infrastrukturunun gücləndirilməsinin regional davamlılıq və əlaqəlilik baxımından strateji əhəmiyyətini bir daha bəyan edib. O, ticarət, energetika, İKT, elm, texnologiya və mədəniyyət sahələrində praktiki və sahəvi əməkdaşlığın genişləndirilməsinin, iş adamları və xalqlar üçün birbaşa imkanların yaradılmasının prioritet təşkil etdiyini bildirib.

Sonda nazir Ceyhun Bayramov Antalya şəhərində keçiriləcək COP31 konfransına və Ankarada təşkil olunacaq TDT-nin 13-cü Sammitinə ev sahibliyi edəcək qardaş Türkiyəyə uğurlar arzulayıb və Azərbaycanın bu çərçivədə daimi dəstəyini bir daha təsdiqləyib.

İclas Türk Dövlətləri Təşkilatının Xarici İşlər Nazirləri Şurasının Bəyanatının qəbul edilməsi ilə uğurla yekunlaşıb.

The Minister of Foreign Affairs of the Republic of Azerbaijan @Bayramov_Jeyhun chaired and addressed the Informal Meeting of the Council of Foreign Ministers of the Organization of Turkic States @Turkic_States on the sidelines of #UNGA81.In his speech, the Minister has… pic.twitter.com/7hFyfrXni0