Hüquqinfo.az bildirir ki,
Amerikalı jurnalist Taker Karlson konqresmen Tomas Messi və ABŞ-dən olan 150-yə yaxın həkim, alim və ictimai xadim Prezident Donald Trampa açıq məktub ünvanlayaraq RNT vaksinlərinin istifadəsinə tam qadağa qoyulmasını tələb ediblər.
“Hüquqinfo.az” “Paradox Press” portalına istinadən xəbər verir ki, məktub müəllifləri tələblərinin yerinə yetirilməyəcəyi təqdirdə Trampı siyasi nəticələrlə və seçici dəstəyini itirməklə hədələyiblər.
“Əgər RNT vaksinlərinin qadağan olunması ilə bağlı əsas xahişimizə diqqət yetirməsəniz, MAHA (“Amerikanı Yenidən Sağlam Edək”) hərəkatı və səhiyyə azadlığı tərəfdarları sizə olan dəstəyini geri çəkəcək. Bu da ciddi siyasi nəticələrə gətirib çıxaracaq”, – deyə məktubun mətnində vurğulanır.
Açıq məktubun müəllifləri ABŞ Səhiyyə Nazirliyinin fəaliyyətini kəskin tənqid edərək onun addımlarını yetərsiz və səmərəsiz adlandırıblar. Onlar farmasevtik şirkətlərlə milyardlarla dollarlıq müqavilələrin uzadılmasından, qripə qarşı yeni RNT vaksinlərinin təsdiqlənməsindən və istehsalçıları yan təsirlərə görə məsuliyyətdən azad edən xüsusi qanunun (PREP Act) qüvvədə qalmasından narazılıqlarını bildiriblər.
Sənədi imzalayanlar bu il 7 milyonu uşaq olmaqla 50 milyondan çox amerikalının COVID-19-a qarşı RNT peyvəndləri almasından ciddi narahatlıq ifadə ediblər. Onlar iddia edirlər ki, mötəbər elmi araşdırmalar və əczaçılıq şirkətlərinin daxili hesabatları bu iynələrin ciddi yan təsirlərə, o cümlədən gənclər arasında miokardit riskinə və reproduktiv pozuntuların artmasına səbəb olduğunu göstərir.
Məktub müəllifləri Trampı RNT vaksinləri və gen terapiyası texnologiyalarını dərhal qadağan etməyə, farmasevtik şirkətlərin hüquqi toxunulmazlığını ləğv etməyə və dərmanların kütləvi auditoriya üçün reklamını dayandırmağa çağırıblar.
Bundan əlavə, onlar xəbərdarlıq ediblər ki, tələbləri gözardı ediləcəyi təqdirdə Konqresə keçiriləcək aralıq seçkilərində və 2028-ci il prezident seçkilərində öz müstəqil namizədlərini irəli sürə bilərlər.
