Hüquqinfo.az bildirir ki,
BMT Baş Assambleyasının 81-ci sessiyası çərçivəsində xarici işlər naziri Ceyhun Bayramov ABŞ hökuməti tərəfindən təşkil olunmuş “Sülh vasitəsilə rifah: Trans-Xəzər ticarət marşrutu və TRIPP-ə investisiya” adlı tədbirdə çıxış edib.
Bildirilib ki, nazir çıxışında Azərbaycanın iqtisadi artımın, dayanıqlı təchizat zəncirlərinin və yeni investisiya imkanlarının hərəkətverici qüvvəsi kimi daha güclü regional əlaqələrə dair baxışını vurğulayıb.
Tədbirdə sülh quruculuğu və rifahı özündə birləşdirən bir layihə kimi TRIPP-ə xüsusi diqqət yetirilib. Qeyd olunub ki, tarixi Vaşinqton Sammitinin əsas nəticələrindən biri olan TRIPP Azərbaycanın əsas hissəsi ilə Naxçıvan Muxtar Respublikası arasında maneəsiz multimodal əlaqəni təmin edəcək, daha geniş koordinasiyanı gücləndirəcək və davamlı regional sülhə töhfə verəcək. Nazir layihənin həyata keçirilməsi prosesində ABŞ-nin göstərdiyi səylərə görə minnətdarlığını bildirib.
Bundan əlavə, nazir Bakı Limanı və Ələt Azad İqtisadi Zonası əsasında formalaşan inteqrasiya olunmuş nəqliyyat və logistika qovşağına Azərbaycanın davamlı investisiyalarını qeyd edib. O, rəqəmsallaşmanın, sadələşdirilmiş logistika və gömrük prosedurlarının, eləcə də, tərəfdaşlar arasında əlaqələndirilmiş fəaliyyətin vacibliyini vurğulayaraq, xüsusilə Qazaxıstan, Türkiyə və Gürcüstanla uğurlu koordinasiya yol xəritələrini qeyd edib.
