Hüquqinfo.az bildirir ki,
ABŞ hakimiyyət orqanları Suriyaya 36 ədəd oğurlanmış arxeoloji artefaktı qaytarıb.
Qaytarılan artefaktlar arasında İŞİD terror təşkilatının Palmira qədim şəhərini dağıtdığı dövrdə qanunsuz yollarla ölkədən çıxarılan daşdan hazırlanmış kiçik heykəl də var.
Ümumi dəyəri 5 milyon dollardan çox olan arxeoloji nümunələr ABŞ-ın Nyu-York şəhərində yerləşən Metropolitan İncəsənət Muzeyindən, eləcə də bir sıra qədim əşya kolleksiyaçılarından müsadirə edilib.
Məlumata görə, UNESCO-nun Ümumdünya İrs Siyahısına daxil edilmiş Palmira ərazisindən çıxarılan daş heykəl 2015-2017-ci illərdə qədim şəhərin böyük hissəsinin İŞİD tərəfindən dağıdılmasından əvvəl qanunsuz şəkildə ölkədən çıxarılıb.
Çəkisi 450 kiloqramdan çox olan əhəngdaşı heykəldə uzanmış vəziyyətdə təsvir edilən kişi fiquru, onun ətrafında isə bir qadın və üç uşaq əks olunub.
Suriyanın Vaşinqtondakı səfirliyinin işlər vəkili Məhəmməd Qənatiri bildirib ki, bu addım mədəni irsin qorunması istiqamətində davamlı əlaqələrin qurulmasına töhfə verə biləcəyini göstərir.
Qeyd edək ki, qaytarılan artefaktlardan 4-ü amerikalı qədim əşya kolleksiyaçısı Maykl Steynhartdan müsadirə olunub. Steynhart 2021-ci ildə ABŞ hökuməti ilə əldə etdiyi razılaşma çərçivəsində dünyanın müxtəlif ölkələrindən oğurlanmış 180-ə yaxın artefaktı geri qaytarıb. Həmin əşyaların ümumi dəyəri 70 milyon dollar təşkil edib.
