Tənhalıq ömrü 6 il qısaldırmış

Hüquqinfo.az bildirir ki,

Yeni araşdırmaya görə, tənhalıq və sosial təcrid insanın əsas xəstəliklərdən azad yaşadığı müddəti əhəmiyyətli dərəcədə qısalda bilər. Təsirin qadınlar və kişilər arasında fərqli olduğu müəyyənləşib.

“Hüquqinfo.az” xəbər verir ki, “sosial təcrid” insanın başqaları ilə məhdud təmasda olması və ortaq fəaliyyətlərdə az iştirak etməsi, tənhalıq isə şəxsin ətrafındakılardan uzaqlaşdığını hiss etməsi kimi izah olunur.

Fərqli anlayışlar olmasına baxmayaraq, “Nature Communications” jurnalında dərc olunan araşdırma hər iki vəziyyətin sağlam ömür illərinin azalması ilə əlaqəli olduğunu göstərib.

Tədqiqatçılar 40-69 yaş arasında 270 mindən çox yetkinin məlumatlarını təhlil ediblər. Nəticələrə görə, tənhalıq və sosial təcrid orta hesabla təxminən 6 xəstəliksiz ömür ilinin itirilməsi ilə əlaqələndirilir.

Araşdırmanın aparıcı müəllifi, Tulane Universitetinin professoru Lu Qi bildirib ki, sosial təcrid və tənhalıq insanın xəstəliksiz ömür uzunluğuna əhəmiyyətli təsir göstərə bilər.

Araşdırmada tənhalıq və sosial təcridin depressiya və narahatlıq kimi psixi pozuntulardan azad yaşanan illərin azalması ilə əlaqəsinin 2-ci tip diabet, ürək-damar, xroniki tənəffüs, neyrodegenerativ xəstəliklər və xərçəng kimi fiziki xəstəliklərdən azad yaşanan illərlə müqayisədə daha güclü olduğu müəyyən edilib.

Həm tənhalıq, həm də sosial təcrid yaşayan 50 yaşlı insanların əsas xroniki xəstəliklərdən azad yaşadığı müddət bu halları yaşamayanlarla müqayisədə daha qısa olub.

Tədqiqat tənhalıq və sosial təcridin qadın və kişilərə eyni şəkildə təsir etmədiyini də göstərib.

Qadınlarda bu iki amil 2,4 il daha pis fiziki sağlamlıq və 3,7 il daha pis psixi sağlamlıq göstəricisi ilə əlaqələndirilib. Kişilərdə isə fiziki xəstəliklərdən azad 1,7 il, psixi pozuntulardan azad isə 5,8 il həyat itkisi ilə əlaqə müəyyən edilib.

Tədqiqatçılar qadınlarda tənhalığın psixi sağlamlıqla daha çox əlaqəli olduğunu, kişilərdə isə psixi sağlamlıq problemlərinin sosial təcridlə daha sıx bağlı göründüyünü bildiriblər.

Müəlliflərin fikrincə, bu fərq qadın və kişilərin sosial dəstək və psixoloji rifaha çatmaq üsullarının fərqli olması ilə əlaqəli ola bilər. Kişilərin daha çox fiziki iştirak və müntəzəm sosial əlaqələrə, qadınların isə emosional dəstəyə üstünlük verməyə meyilli olduğu qeyd edilib.

Araşdırmaya görə, sağlam həyat tərzinin qorunması sosial təcridin mənfi təsirlərini müəyyən qədər azalda bilər. Lakin bunun tənhalığın sağlamlığa vurduğu zərəri tam kompensasiya etmədiyi müəyyənləşib.

Tədqiqat həmçinin kişilərin tənhalıq və sosial təcrid yaşamaq ehtimalının daha yüksək olduğunu göstərib. Bununla yanaşı, onların sosial, maddi və iqtisadi resurslara çıxışının, eləcə də, sağlam həyat tərzi göstəricilərinin daha aşağı olduğu müəyyən edilib.