Hüquqinfo.az bildirir ki,
Ələt Azad İqtisadi Zonasının investorlar üçün ən cəlbedici tərəfi onun unikal qanunvericilik bazasıdır.
"Hüquqinfo.az" xəbər verir ki, bunu Zonanın Səlahiyyətli Qurumunun İdarə Heyətinin sədri Valeh Ələsgərov Bakıda keçirilən II Azərbaycan Beynəlxalq İnvestisiya Forumu (2nd Azerbaijan International Investment Forum – AIIF 2026) çərçivəsində panel müzakirədə bildirib.
"Digər ölkələrdə azad iqtisadi zonalar çox vaxt ölkənin standart qanunları çərçivəsində yaradılır, yəni bir çox milli qanunlar hələ də tətbiq olunur. Bizidə isə Parlamentin qəbul etdiyi, Prezidentin üstün qanun kimi imzaladığı "Azad İqtisadi Zona haqqında" qanun var. Bu o deməkdir ki, bu qanunda xüsusi olaraq qeyd olunmayan hər hansı qanun iqtisadi zonanın ərazisində və yaxud onun subyektlərinə tətbiq olunmur. Yalnız üç növ milli qanun qeyd olunub: cinayətkarlıqla bağlı qanunlar və çirkli pulların yuyulmasının qarşısının alınması haqqında qanunlar", - deyə o qeyd edib.
Sədrin sözlərinə görə, bu, investorlar üçün çox vacib məqamdır: "Bizim hüquqi çərçivəmiz "Azad İqtisadi Zona haqqında" qanundan, lisenziyalaşdırma, planlaşdırma və tikinti qaydaları kimi daxili qaydalarımızdan ibarətdir. Məsələn, daxili qaydalarımızla ümumi qanunlar arasında hər hansı ziddiyyət olduqda, daxili qaydalarımız üstünlük təşkil edəcək. Bu, müştərilərimizə zəmanət verir ki, üç, beş və ya on ildən sonra heç kim oyunun qaydalarını dəyişdirməyə cəhd etməyəcək. Bu, potensial müştərilər üçün həlledici məqamdır və müxtəlif ölkələrdən olan investorlar üçün cəlbedici olmağımızın səbəbi budur".
