Hüquqinfo.az bildirir ki,
Asiya İnkişaf Bankı (ADB) kritik əhəmiyyətli mineral resurslarla bağlı layihələrin icrası zamanı Azərbaycan hökumətinin ilk növbədə diqqət yetirməli olduğu iki əsas istiqaməti müəyyənləşdirib.
"Hüquqinfo.az" xəbər verir ki, bu barədə ADB-nin Azərbaycandakı nümayəndəliyinin rəhbəri Sunniya Durrani-Camal II Azərbaycan Beynəlxalq İnvestisiya Forumunda (AIIF 2026) bildirib.
"Azərbaycanda müxtəlif istiqamətlər üzrə nəzərəçarpacaq dinamika müşahidə edirik. Hasilat sektoruna gəldikdə isə, Naxçıvandakı fəaliyyət barədə eşitmək sevindiricidir. Bunun yeni iş yerlərinin yaradılması, məşğulluq səviyyəsinin artırılması və ümid edirik ki, istehsal güclərinin genişləndirilməsi baxımından verə biləcəyi faydalar aydındır. Paralel olaraq Ələt Azad İqtisadi Zonasında işlər irəliləyir və bu gün səhər orada data-mərkəz layihəsinin razılaşdırılması barədə məlumat aldım", - S.Durrani-Camal vurğulayıb.
ADB nümayəndəliyinin rəhbəri qeyd olunan təşəbbüslərin irəli aparılması zamanı hökumətin xüsusi diqqət yetirməli olduğu iki əsas komponenti diqqətə çatdırıb: güzəştli rejimlər üçün əsas səmərəlilik göstəriciləri (KPI) sisteminin formalaşdırılması və elmi tədqiqatlar və inkişaf (R&D) sektorunun gücləndirilməsi.
"Birincisi, söhbət həyata keçirilən bütün investisiyalar və təqdim edilən vergi güzəştləri üçün şəffaf KPI-ların mövcud olmasından gedir. Bu, dövlət iqtisadi siyasətinin sözügedən alətlərinin səmərəliliyini obyektiv qaydada ölçmək üçün zəruridir. İkinci komponent elmi tədqiqatlar və inkişafdır. Xüsusilə kritik əhəmiyyətli minerallar sahəsində dövlət qurumları, formalaşmaqda olan sənaye və elmi-akademik cəmiyyət arasında əməkdaşlıq həlledici əhəmiyyət kəsb edəcək. Hesab edirəm ki, KPI sistemi və bu "üçqat spiral" modeli dövlət kapital qoyuluşlarından əldə olunan səmərənin qiymətləndirilməsində hökumət üçün müəyyənedici amil qismində çıxış edəcək", - S.Durrani-Camal bildirib.
Bizi Sosial Şəbəkələrdə İzləyin
Ən son xəbərlərdən anında xəbərdar olun.
