Hüquqinfo.az bildirir ki,
Azərbaycan və Mərkəzi Asiya ölkələri rəqabətdən investisiya sahəsindəki layihələrin birgə icrasına keçirlər.
"Hüquqinfo.az" xəbər verir ki, bunu Azərbaycanın İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev Bakıda keçirilən II Azərbaycan Beynəlxalq İnvestisiya Forumunda (2nd Azerbaijan International Investment Forum – AIIF 2026) bildirib.
Onun sözlərinə görə, Azərbaycan bir sıra Mərkəzi Asiya ölkələri ilə ikitərəfli fondlar təsis edib, bu da layihələrin birgə həyata keçirilməsi üçün imkanlar yaradır.
"Üç-dörd və ya beş il əvvəl biz bəlkə də rəqabət aparırdıq, amma indi birlikdə işləyirik. Düşünürəm ki, bu, çox vacibdir", - Y.Abdullayev deyib.
O qeyd edib ki, regionun hər bir ölkəsinin xarici investorlar üçün öz imkanları var, Azərbaycan üçün isə əsas üstünlüklərdən biri onun coğrafi mövqeyidir.
"Ölkəmizin bu kəsişmədə yerləşməsi indiki şəraitdə və dünyada baş verənlər nəzərə alınmaqla bizim üçün həlledici əhəmiyyət kəsb edir", - AZPROMO-nun rəhbəri qeyd edib.
Y.Abdullayev həmçinin vurğulayıb ki, region ölkələrinin investisiyaların cəlb edilməsi üzrə agentlikləri və müvafiq dövlət qurumları daha cəlbedici stimullar təklif edərək və biznesin tələbatını nəzərə almaqla yeni imkanlar yaradaraq investorlar uğrunda öz aralarında rəqabət aparmaqda davam edirlər.
Bununla yanaşı, onun sözlərinə görə, regionda xarici investorlar üçün ən cəlbedici amillərdən biri siyasi sabitliyin olmasıdır.
