AMB-nin sədri: "Strateji valyuta ehtiyatlarımız 41 aylıq idxalı qarşılayır"

Hüquqinfo.az bildirir ki,

Azərbaycanın strateji valyuta ehtiyatları 41 aylıq idxalı qarşılamağa kifayətdir.

"Hüquqinfo.az" xəbər verir ki, bunu Azərbaycan Mərkəzi Bankının (AMB) sədri Taleh Kazımov Bakıda keçirilən II Azərbaycan Beynəlxalq İnvestisiya Forumunda (2nd Azerbaijan International Investment Forum – AIIF 2026) bildirib.

Onun sözlərinə görə, Azərbaycan iki reytinq agentliyindən - "Fitch" və "Moody"s"dən investisiya səviyyəli suveren reytinqlərə malikdir: "Güclü makroiqtisadi əsaslarımız və maliyyə sabitliyimizlə yanaşı, bu reytinqlər investor inamı üçün mühüm bünövrə yaradır. Bu inam Azərbaycanın makroiqtisadi dayanıqlılığı ilə dəstəklənir. Manatın məzənnəsi 2017-ci ildən bəri sabit qalıb. Avqust ayının sonuna olan məlumata görə, Azərbaycanın ümumi strateji ehtiyatları 90,8 milyard ABŞ dolları təşkil edib ki, bu da illik ümumi daxili məhsulun (ÜDM) dəyərindən çoxdur. Strateji ehtiyatlar həm də manatla geniş pul təklifindən 3,5 dəfə böyükdür. Xarici dövlət borcu ÜDM-in cəmi 6 %-i səviyyəsindədir. Aynı zamanda, dollarlaşma azalmaqda davam edib və rezident fiziki şəxslərin xarici valyutada olan depozitlərinin payı tarixi minimuma - 25,8 %-ə düşüb".