Azərbaycan və İran arasında energetika sahəsində bir sıra məsələlər müzakirə olunub

Hüquqinfo.az bildirir ki,

Tehranda qış mövsümü üçün Azərbaycandan İrana elektrik enerjisi idxalının artırılması müzakirə olunub.

Hüquqinfo.az-nın Tehran bürosunun məlumatına görə, Azərbaycan energetika nazirinin müavini Elnur Soltanov və İranın Elektrik Enerjisinin İstehsalı, Ötürülməsi və Paylanmasının İdarə Edilməsi Şirkətinin baş direktoru Məhəmməd Allahdad Tehranda keçirilən görüşdə enerji mübadiləsi, Azərbaycandan İrana birbaşa elektrik enerjisi idxalının artırılması, birgə su elektrik stansiyalarının inkişafı və tamamlanması, həmçinin qaz və elektrik enerjisinin svopu məsələlərini müzakirə ediblər.

Elnur Soltanov görüşdə sərhəd ərazilərində həyata keçirilən birgə su elektrik stansiyası layihələrinə, o cümlədən Xudafərin və Ordubad layihələrinə toxunaraq, bu stansiyaların tikintisi və tamamlanması prosesi, həmçinin istismara verildikdən sonra yaranacaq imkanlarla bağlı müzakirələrin aparıldığını bildirib.

O qeyd edib ki, bu stansiyaların tamamlanması ilə yeni elektrik enerjisi istehsalı gücü yaranacaq və gələcəkdə həmin stansiyalarda istehsal olunan elektrik enerjisinin bir hissəsinin İrana verilməsi və göndərilməsi mümkün olacaq.

Azərbaycan energetika nazirinin müavini iki ölkənin özəl sektorları arasında bərpa olunan enerji sahəsində əməkdaşlıq imkanlarının da müzakirə edildiyini bildirib.

Onun sözlərinə görə, görüşdə güclü və fəal iranlı investorların Azərbaycanda, xüsusilə Naxçıvanda həyata keçirilən günəş elektrik stansiyası layihələrinə cəlb olunması məsələsi müzakirə edilib.

Elnur Soltanov əlavə edib ki, İranın özəl sektor investorları birgə əməkdaşlıq və texniki-mühəndislik xidmətlərinin göstərilməsi çərçivəsində Azərbaycanda günəş elektrik stansiyalarının tikintisi layihələrində iştirak edə bilərlər.

O, mövcud imkanların qiymətləndirilməsi və layihələrin icrası üçün şəraitin yaradılması ilə bu əməkdaşlığın gələcəkdə iki ölkə arasında enerji və investisiya əlaqələrinin inkişafına töhfə verəcəyinə ümid etdiyini bildirib.

Nazir müavini görüş zamanı Məhəmməd Allahdadı Azərbaycanın elektrik şəbəkəsinin vəziyyətinin öyrənilməsi və birgə əməkdaşlığın inkişafı məqsədilə Azərbaycana səfərə dəvət edib.

İranın Elektrik Enerjisinin İstehsalı, Ötürülməsi və Paylanmasının İdarə Edilməsi Şirkətinin baş direktoru isə iki ölkə arasında elektrik enerjisi sahəsində əməkdaşlığın tarixinə toxunaraq, İran və Azərbaycanın dost, qardaş və qonşu ölkələr kimi uzun illər ərzində mədəni, tarixi və texniki sahələrdə yaxşı əlaqələrə malik olduğunu, elektrik enerjisi sahəsində də birgə əməkdaşlığın formalaşdığını bildirib.

Məhəmməd Allahdad iki ölkənin elektrik enerjisi əlaqələrinin inkişafı üçün mövcud imkanlardan əvvəlkindən daha geniş istifadə edilməli olduğunu deyib.

O bildirib ki, aparılan danışıqlar və mövcud imkanlar nəzərə alınaraq, qarşıdakı qışda Azərbaycandan İrana enerji idxalının artırılması üçün şəraitin yaradılacağına ümid edir.

Məhəmməd Allahdadın sözlərinə görə, əməkdaşlığın həcmini və formasını müəyyənləşdirmək üçün iki ölkənin ekspert qruplarının şəbəkələrin müxtəlif birləşmə nöqtələrində mövcud imkanları, həmçinin elektrik enerjisi idxalının texniki və icra şərtlərini ixtisaslaşmış şəkildə araşdırması qərara alınıb.

O, həmçinin İran və Azərbaycan arasında Naxçıvan da daxil olmaqla müxtəlif sərhəd ərazilərində elektrik enerjisi sahəsində əməkdaşlığın tarixini qeyd edərək, iki ölkə arasında elektrik enerjisi bağlantılarının və enerji əməkdaşlığının inkişaf etdirilməsi və gücləndirilməsinin gələcək illərdə ikitərəfli əlaqələrin genişlənməsinə zəmin yarada biləcəyini vurğulayıb.