Hüquqinfo.az bildirir ki,
Pakistan hazırda şimal-cənub magistral yolunun təxminən 70 %-inin inşasını başa çatdırıb.
"Hüquqinfo.az" xəbər verir ki, bunu Pakistanın federal rabitə naziri Alem Xan (Aleem Khan) Bakıda keçirilən II Azərbaycan Beynəlxalq İnvestisiya Forumunda (2nd Azerbaijan International Investment Forum – AIIF 2026) bildirib.
Nazirin sözlərinə görə, layihənin 30 %-i hələ tamamlanmayıb və bu hissənin gələn üç il ərzində başa çatdırılması planlaşdırılır:
"Bu, Pakistanı Ərəbistan dənizindən avtomobil yolu vasitəsilə Çinə qədər birləşdirəcək. Çin üzərindən biz əlaqə imkanlarını Əfqanıstan, eləcə də Mərkəzi Asiya ölkələrinə qədər genişləndirmək fürsəti əldə edə bilərik. Bu əlaqələndirmə sayəsində hesab edirəm ki, Pakistanda yeni investisiya perspektivləri üçün olduqca böyük potensial mövcuddur. Yalnız Qərbi Çindən Körfəz dövlətlərinə istiqamətlənən ticarətdən əldə ediləcək rüsumlar baxımından deyil, eyni zamanda Mərkəzi Asiya ölkələrindən Körfəz dövlətlərinə və oradan da dünyanın digər bölgələrinə qədər".
A. Xan qeyd edib ki, Pakistanın əsas üstünlüyü dünya xəritəsindəki strateji coğrafi mövqeyidir: "Bir tərəfdən, şimal-şərqimizdə Çin yerləşir. Şimal-qərbdə isə bütün Mərkəzi Asiya dövlətləri mövcuddur, onların bir qismi dənizə çıxışı olmayan ölkələrdir. Qərbdə Əfqanıstan və İran var, cənubda isə, şübhəsiz ki, Ərəbistan dənizi. Pakistan öz coğrafi mövqeyindən yararlanaraq Çinin qərb bölgəsinə Ərəbistan dənizinə, daha sonra isə Mərkəzi Asiyanın bütün dənizə çıxışı olmayan ərazilərinə giriş imkanı yarada bilər. Bu, Mərkəzi Asiya dövlətləri ilə Körfəz ölkələri arasında Pakistan dəhlizləri vasitəsilə, hətta Ərəbistan dənizinə qədər ən qısa mümkün marşrutu təşkil edir. Əlaqələndirmə imkanları iqtisadiyyatımız üçün əsas hərəkətverici qüvvəyə çevrilə bilər".
Bizi Sosial Şəbəkələrdə İzləyin
Ən son xəbərlərdən anında xəbərdar olun.
