Hüquqinfo.az bildirir ki,
27 Sentyabr – Anım Günü ilə əlaqədar Suraxanı rayonunun Zığ qəsəbəsi, Bahar yaşayış sahəsində ağacəkmə aksiyası və “Qeyd-Sosial Maarifləndirmə” İctimai Birliyinin təşkilatçılığı ilə rəsm sərgisi keçirilib.
“Hüquqinfo.az” xəbər verir ki, tədbirdə Suraxanı Rayon İcra Hakimiyyətinin başçısı Adil Əliyev, Yeni Azərbaycan Partiyası Suraxanı Rayon Təşkilatının sədri Vüqar Seyidov, deputat Qaya Məmmədov, rayonun hüquq-mühafizə orqanlarının rəhbərləri, Rayon İcra Hakimiyyəti başçısının müavinləri və Aparatın əməkdaşları, şəhid ailələri, müharibə iştirakçıları və ictimaiyyət nümayəndələri iştirak ediblər.
Anım Günü münasibətilə keçirilən ağacəkmə aksiyası çərçivəsində ərazidə ümumilikdə 750 ədəd sərv ağacı əkilib. Aksiyanın keçirilməsində məqsəd Vətən uğrunda canından keçmiş şəhidlərimizin əziz xatirəsini ehtiramla yad etmək, onların qəhrəmanlığını gələcək nəsillərə çatdırmaq, eyni zamanda ətraf mühitin qorunmasına və rayon ərazisində yaşıllıqların artırılmasına töhfə vermək olub.
Tədbir çərçivəsində təşkil olunan rəsm sərgisində Vətən müharibəsi, qəhrəmanlıq, vətənpərvərlik və şəhidlərin əziz xatirəsinə həsr olunmuş rəsmlər nümayiş etdirilib. Sərgi iştirakçılar tərəfindən maraqla qarşılanıb, nümayiş olunan rəsmlər vasitəsilə xalqımızın Vətən müharibəsində göstərdiyi birlik, əzm və qəhrəmanlıq ruhu bir daha diqqətə çatdırılıb.
