Çin Asiyadan Avropaya yükdaşımalarda yeni multimodal marşrutları araşdırır

Hüquqinfo.az bildirir ki,

Çin Asiya və Avropa arasında yükdaşımaların genişləndirilməsi üçün yeni multimodal marşrutları, o cümlədən dəmir yolu, avtomobil və dəniz nəqliyyatından istifadəni nəzərdən keçirir.

"Hüquqinfo.az" xəbər verir ki, bu barədə Çinin Azərbaycandakı Səfirliyinin ticari-iqtisadi məsələlər üzrə müşaviri Yu Hunçi (Yu Hongchi) Bakıda keçirilən II Azərbaycan Beynəlxalq İnvestisiya Forumunda (2nd Azerbaijan International Investment Forum – AIIF 2026) bildirib.

Onun sözlərinə görə, Transxəzər Beynəlxalq Nəqliyyat Marşrutu (TBNM, Orta Dəhliz) və Çin-Avropa yük ekspresslərinin cənub marşrutu yüksək inkişaf dinamikası nümayiş etdirir.

"Biz Çin ilə Mərkəzi Asiya, Cənubi Qafqaz və Avropa ölkələri arasında nəqliyyat əlaqələrinin daha da genişləndirilməsi üçün əhəmiyyətli potensial görürük. Bu prosesdə multimodal daşımaların inkişafı və mövcud logistika infrastrukturunun səmərəliliyinin artırılması mühüm rol oynayır", – Yu Hunçi deyib.

O vurğulayıb ki, Xəzər dənizi ilə daşımalar həm Qazaxıstanın Aktau və Kurık limanları vasitəsilə, həm də Türkmənistanın Türkmənbaşı limanının aktiv cəlb edilməsi ilə həyata keçirilir.

"Çin-Qırğızıstan-Özbəkistan-Türkmənistan beynəlxalq dəmir yolu-avtomobil marşrutları da daxil olmaqla, yeni multimodal modellər üzərində işlənilir", - Yu Hunçi əlavə edib.

Onun sözlərinə görə, belə marşrutların inkişafı nəqliyyat əlaqələrinin coğrafiyasını genişləndirməyə və Çinlə Avropa bazarları arasında yüklərin çatdırılması üçün əlavə variantlar formalaşdırmağa imkan verəcək.