"Standard Chartered": Azərbaycanda bir sıra qurumlarla yeni maliyyələşmə imkanlarını müzakirə edirik

Hüquqinfo.az bildirir ki,

“Standard Chartered Bank” Azərbaycanda bir sıra qurumlarla müxtəlif layihələrin maliyyələşdirilməsi imkanları ilə bağlı danışıqlar aparır.

“Hüquqinfo.az-Economics” xəbər verir ki, bunu Bakıda keçirilən Azərbaycan Beynəlxalq İnvestisiya Forumu (AIIF 2026) çərçivəsində panel müzakirəsində “Standard Chartered Bank”ın Development & Agency Finance üzrə icraçı direktoru Desislava Radeva bildirib.

Desislava Radeva qeyd edib ki, Azərbaycan güclü maliyyə mövqeyinə və enerji sektorunda formalaşmış təcrübəyə malikdir və iqtisadiyyatın şaxələndirilməsi istiqamətində proses artıq davam edir.

“Azərbaycandakı bir sıra qurumlarla artıq işləyirik və onlarla hansı istiqamətlərdə dəstək göstərə biləcəyimizi müzakirə edirik”, – Desislava Radeva bildirib.

Desislava Radevanın sözlərinə görə, “Standard Chartered Bank” kommersiya banklarından əlavə maliyyələşmənin cəlb edilməsinə, UK Export Finance (UKEF) kimi ixrac-kredit agentlikləri və çoxtərəfli maliyyə institutlarının imkanlarından istifadə etməklə risklərin azaldılmasına, maliyyələşmənin müddətinin uzadılmasına və şərtlərin daha cəlbedici olmasına kömək edə bilər.

Desislava Radeva bildirib ki, bu cür maliyyələşmə modelləri Azərbaycanda da tətbiq oluna bilər. Xüsusilə nəqliyyat, mədənçilik, bərpa olunan enerji, su və digər iri infrastruktur layihələrində ixrac-kredit agentliklərinin, inkişaf maliyyə institutlarının və kommersiya banklarının birgə iştirakı imkanları mövcuddur.

Desislava Radeva nümunə kimi “Standard Chartered Bank”ın bu il Qazaxıstanda tamamladığı üç iri əməliyyatı göstərib. Bunlardan biri Orta Dəhliz çərçivəsində Qazaxıstanın dəmir yolu şirkətinin layihəsinin maliyyələşdirilməsi olub. Layihənin maliyyələşdirilməsində IFC, Asiya İnfrastruktur İnvestisiya Bankı (AIIB) və “Standard Chartered Bank” birlikdə iştirak edib.

Desislava Radeva digər iri əməliyyat çərçivəsində Qazaxıstan üzrə yol layihələrinin maliyyələşdirilməsinə 800 milyon ABŞ dolları həcmində vəsaitin yönəldildiyini bildirib. Zəmanət mexanizminin tətbiqi bu həcmdə uzunmüddətli maliyyələşmənin cəlb edilməsinə imkan verib.

Desislava Radeva vurğulayıb ki, belə strukturlar Azərbaycanda da təkrarlana bilər. UKEF-in iştirakı xüsusilə nəqliyyat və mədənçilik kimi layihələrə Böyük Britaniya təcrübəsinin və təchizat zəncirinin cəlb edilməsinə, MIGA və digər beynəlxalq maliyyə institutlarının iştirakı isə yerli komponentin daha yüksək olduğu layihələr üçün uzunmüddətli maliyyələşmənin təşkilinə imkan yarada bilər.