“Günlərdir su boş-boşuna axıb zay olur”

Hüquqinfo.az bildirir ki,

“Günlərdir küçəmizdəki borudan su boş-boşuna axıb zay olur. Bütün küçə suyun altında qalıb. Bu qədər axan suyun pulunu kim ödəyəcək?”

Bu şikayətlə “Hüquqinfo.az”ya Sahil qəsəbəsi Emin Quliyev küçəsində yaşayan Əfiqə Məmmədova müraciət edib.

Onun sözlərinə görə, küçədə su borusu üç fərqli yerdən partlayıb və günlərdir su küçəyə axır: “Borulardan ikisini neçə gün sonra gəlib düzəltdilər. Bəzən də təzə asfaltlanan yerləri qazırlar. Eyni problem bu küçənin təxminən 50 metrliyində yerləşən daha iki küçədə var”.

Ə.Məmmədova bildirib ki, bir müddət əvvəl ərazidə sayğaclarla bağlı yoxlamalar aparılıb: “Bizdə oğurluq su yoxdur. Sayğacımız da düzgün işləyir. Həyətdə köhnə, işləməyən bir boru olub. Bir ay sonra gəlib 240 manat cərimə yazıblar. Adamı ən çox yandıran da budur. Su qıtlığı olan bir vaxtda günlərdir küçələrə boş yerə su axır, israf olur.

Bu, ərazidə baş verən ilk belə hal deyil. Dərdimizi kimə deyəcəyimizi bilmirik. Küçənin hər tərəfi bu vəziyyətdədir. İki-üç günə düzəldəcəklər, ya bir həftəyə, bunu bilmirik. Amma suyun günlərlə boşuna axması yolverilməzdir”.

Sözügedən şikayətlə bağlı Azərbaycan Dövlət Su Ehtiyatları Agentliyinə (ADSEA) ünvanladığımız sorğuya belə cavab aldıq: “Qəza zamanı axıntı varsa, həmin axıntı heç kimin sayğacından keçmir və heç kimə borc yazılmır. Qəzalı borular təmir edilib, digər boruya da baxılacaq”.