Hüquqinfo.az bildirir ki,
Azərbaycan yaxın günlərdə Xəzər-Qara dəniz-Avropa Yaşıl Enerji Dəhlizinə Avropa İttifaqının Qarşılıqlı Maraq Layihəsi (PMI) statusunun verilməsi üçün müraciət təqdim edəcək.
"Hüquqinfo.az" xəbər verir ki, bunu energetika naziri Pərviz Şahbazov Bakıda keçirilən II Azərbaycan Beynəlxalq İnvestisiya Forumunda (2nd Azerbaijan International Investment Forum – AIIF 2026) bildirib.
Onun sözlərinə görə, ümumi ötürmə gücü təxminən 4 giqavatt olan Xəzər-Qara dəniz-Avropa Yaşıl Enerji Dəhlizinin texniki-iqtisadi əsaslandırması layihənin texniki və iqtisadi cəhətdən həyata keçirilə bilən olduğunu təsdiqləyib: "Məqsəd 2029-cu ildə yekun investisiya qərarına nail olmaqdır, dəhliz 2032-ci ildən 2040-cı ilə qədər mərhələlərlə istismara verilməlidir. Azərbaycanı Macarıstanla birləşdirən bu dəhliz Elektrik Enerji üzrə Ötürmə Sistemi Operatorlarının Avropa Şəbəkəsinin (ENTSO-E) 10 illik Şəbəkə İnkişaf Planının layihəsinə vahid layihə kimi daxil edilib. Tam istismara verildikdən sonra dəhlizin 20 teravatt-saatdan çox elektrik enerjisinin ixracına imkan verəcəyi gözlənilir".
O bildirib ki, layihənin strateji əhəmiyyəti ötürüləcək elektrik enerjisinin həcmindən kənara çıxır: "Xəzər dənizindən Avropaya qədər uzanan bu dəhliz təkcə enerji sistemlərini deyil, həm də iqtisadiyyatları və investisiya imkanlarını birləşdirəcək, regionlararası əməkdaşlığı inkişaf etdirəcək, Avropanın enerji təchizatını diversifikasiya edəcək və təmiz enerji keçidini irəliləyəcək".
Bizi Sosial Şəbəkələrdə İzləyin
Ən son xəbərlərdən anında xəbərdar olun.
