Hüquqinfo.az bildirir ki,
Rəqəmsal innovasiyalar bütün müxtəlif ölçülü təsərrüfatlar və müəssisələr üçün əlçatan olmalıdır.
"Hüquqinfo.az" xəbər verir ki, bunu BMT-nin Ərzaq və Kənd Təsərrüfatı Təşkilatının (FAO) Avropa və Mərkəzi Asiya üzrə regional nümayəndəsi, Baş direktorun köməkçisi Viorel Gutu Bakıda keçirilən II Azərbaycan Beynəlxalq İnvestisiya Forumu (2nd Azerbaijan International Investment Forum – AIIF 2026) çərçivəsində keçirilən panel müzakirədə çıxışı zamanı bildirib.
Onun sözlərinə görə, burda 4 əsas prinsip var: "Birincisi – əlçatanlıq, səmərəli çıxış imkanı və imkan yaradan şəraitdir. Bu, rabitə (bağlantı), maliyyə baxımından əlçatanlıq, məlumatlara və rəqəmsal xidmətlərə çıxış haqqında danışdığımız ən mühüm prinsiplərdən biridir. İkincisi – rəqəmsal bacarıqlara və məsləhət potensialına sərmayə qoymaqdır. Üçüncüsü – müxtəlif üsullarla texnoloji tətbiqlərin xərclərini azaltmağa çalışmaqdır. Dördüncüsü fermerlərlə birlikdə layihələndirməkdir".
V. Gutu qeyd edib ki, FAO Azərbaycanla sıx və səmərəli əməkdaşlıq edir: "Azərbaycanda "Ağıllı kənd" konsepsiyasının tətbiqi, toxumçuluğun idarə olunması və bitki mühafizəsinin rəqəmsallaşdırılması, eləcə də laboratoriya və keyfiyyət infrastrukturunun qurulması istiqamətində mühüm dəstək göstərmişik. Bu tədbirdən öncə torpaq, su və toxum analizləri aparan laboratoriyalardan birinə baş çəkdim. Görülən işlər təqdirəlayiqdir və biz bu prosesin tərkib hissəsi olmaqdan qürur duyuruq".
O əlavə edib ki, FAO kənd təsərrüfatında rəqəmsal transformasiyanı və qabaqcıl təcrübələrin yayılmasını təşviq edən müxtəlif beynəlxalq platformalar həyata keçirir: "Təşkilatımız tərəfindən icra olunan "Rəqəmsal Kəndlər Təşəbbüsü" (Digital Villages Initiative) kənd yerlərinə diqqət yetirmək, uğurlu təcrübələri nümayiş etdirmək və onları digər bölgələrə ötürmək məqsədi daşıyır. Artıq bu rəqəmsal kəndlərin geniş şəbəkəsi formalaşıb. Həmçinin, regional öyrənməni dəstəkləyən "Agritech Observatory" platforması vasitəsilə bilik mübadiləsini təmin edirik. Bununla yanaşı, açıq istifadədə olan süni intellekt alətləri fermerlərə yerli və regional şəraitə uyğunlaşdırılmış anlıq, peşəkar məsləhətlər almaq imkanı yaradır".
