Hüquqinfo.az bildirir ki,
İranın son hava məhdudiyyətlərinə cavab olaraq hərbi qarşılıq verəcəyi barədə iddia təkzib edilir.
Hüquqinfo.az-nın Tehran bürosunun məlumatına görə, bu barədə İran Ali Milli Təhlükəsizlik Şurasının katibliyi açıqlama yayıb.
Açıqlamada İran Ali Milli Təhlükəsizlik Şurasının katibinin hava nəqliyyatı ilə bağlı çıxışının həqiqətə uyğun olmayan formada şərh edilməsi və sitatların yayılmasının müxtəlif sual və qeyri-müəyyənliklərə səbəb olduğu bildirilib.
Katibliyin açıqlamasında İranın son hava məhdudiyyətlərinə cavab olaraq hərbi qarşılıq verəcəyi barədə iddianın təkzib edildiyi qeyd olunub.
Bildirilib ki, İranla müvafiq ölkələr arasında yaradılmış bəzi qanunsuz hava məhdudiyyətlərinin aradan qaldırılması istiqamətində danışıqlar ciddi şəkildə davam etdirilir və məsələ diqqətdə saxlanılır.
Açıqlamada vurğulanıb ki, qarşılıq verməyin bir sıra qeyri-hərbi yolları mövcuddur və zərurət yaranacağı təqdirdə bu üsullar bəzi hava limanlarına tətbiq ediləcək.
“Ümid edirik ki, məsələ bu mərhələyə gəlib çatmayacaq”, - deyə açıqlamada bildirilib.
Qeyd edək ki, bundan bir neçə saat əvvəl Tehran İmam Xomeyni Beynəlxalq Hava Limanı son uçuş vəziyyəti ilə bağlı açıqlama yayıb. Bildirilib ki, hazırda BƏƏ, İraq və Gürcüstan reysləri də daxil olmaqla ləğv edilmiş uçuşlardan başqa, xarici ölkələr tərəfindən yeni uçuş ləğvi ilə bağlı hər hansı məlumat verilməyib.
Açıqlamada qeyd olunub ki, hazırda İrandan Türkiyə, Çin, Malayziya, Vyetnam, Əfqanıstan və Pakistana uçuşlar həyata keçirilir.
Həmçinin bildirilib ki, İran Mülki Aviasiya Təşkilatının rəsmiləri bağlanmış uçuş marşrutlarının yenidən açılması istiqamətində danışıqlar aparır.
