Hüquqinfo.az bildirir ki,
Enerji effektivliyi ilə bağlı qanunvericiliyin təkmilləşdirilməsi mühüm əhəmiyyət daşıyır.
Hüquqinfo.az xəbər verir ki, bunu Milli Məclisin Təbii ehtiyatlar, energetika və ekologiya komitəsinin bu gün keçirilən iclasında komitə sədrinin müavini Fatma Yıldırım bildirib.
Deputat deyib ki, təbii ehtiyatların səmərəli idarə olunması, enerji təhlükəsizliyinin təmin edilməsi və ətraf mühitin qorunması bu gün dövlət siyasətinin bir-biri ilə sıx bağlı olan əsas istiqamətlərindəndir: “2026-cı ilin yaz sessiyasının ilk iclasından başlayaraq komitənin gündəliyində mühüm qanunvericilik məsələləri olub. Yanvarın 22-də keçirilən ilk iclasda üç məsələyə baxılıb, fevralın 17-də isə “Yerin təki haqqında” qanunda dəyişikliklərlə bağlı qanun layihəsi müzakirəyə çıxarılıb. Bu məsələlər arasında xüsusilə təbii ehtiyatlardan istifadə, enerji resurslarının səmərəliliyi və ekoloji tələblərin təkmilləşdirilməsi ilə bağlı müddəalar diqqət çəkir. Hesab edirəm ki, bu istiqamətdə qanunvericiliyin müasir iqtisadi və ekoloji çağırışlara uyğunlaşdırılması davamlı proses olmalıdır. Burada bir məqamı xüsusi vurğulamaq istərdim. Azərbaycanın enerji siyasəti artıq yalnız ənənəvi enerji resurslarının hasilatı və ixracı ilə məhdudlaşmır. Ölkəmiz bərpa olunan enerji mənbələrinin inkişafını, enerji səmərəliliyini və yaşıl iqtisadiyyata keçidi də strateji istiqamət kimi müəyyən edib. Komitənin qanunvericilik fəaliyyəti də bu yeni mərhələnin tələblərinə uyğun şəkildə formalaşır. Növbədənkənar sessiya dövründə də komitənin fəaliyyəti davam etdirilib. İyulun 7-də keçirilən iclasda “Enerji resurslarından səmərəli istifadə və enerji effektivliyi haqqında” qanunda dəyişikliklərlə bağlı layihə, həmçinin “Qaz təchizatı haqqında” Qanunun tətbiqi ilə əlaqədar qanunvericilikdə uyğunlaşdırma xarakterli dəyişikliklər müzakirə olunub. Burada enerji effektivliyi məsələsini ayrıca qeyd etmək istəyirəm. Enerjiyə qənaət artıq yalnız iqtisadi məsələ kimi qəbul edilmir. Bu, həm də ətraf mühitin qorunması, resurslardan səmərəli istifadə və gələcək nəsillər qarşısında məsuliyyət məsələsidir. Ona görə də enerji effektivliyi ilə bağlı qanunvericiliyin təkmilləşdirilməsi mühüm əhəmiyyət daşıyır. qarşıdakı dövrdə də əsas məqsədimiz qəbul olunan qanunların yalnız hüquqi baxımdan təkmil olması ilə kifayətlənməməli, onların praktikada effektiv tətbiqinə də diqqət yetirilməlidir”.
