Hüquqinfo.az bildirir ki,
Azərbaycanın enerji sahəsində həyata keçirdiyi regional və sərhədlərarası layihələr bərpa olunan enerji mənbələrinin (BOEM) inteqrasiyası baxımından mühüm üstünlük yaradır.
"Hüquqinfo.az" xəbər verir ki, bunu Azərbaycanın energetika nazirinin müavini Orxan Zeynalov II Azərbaycan Beynəlxalq İnvestisiya Forumu (AIIF 2026) çərçivəsində keçirilən paneldə çıxışı zamanı bildirib.
O qeyd edib ki, Mərkəzi Asiyadan Avropaya qədər geniş coğrafiya "yaşıl enerji"nin nəqli üçün strateji imkanlar açır: "Müəyyən dəhliz üzrə layihə komandası və məsləhətçi ilə spesifik detalları müzakirə edərkən hər zaman nəzərə almalısınız ki, Mərkəzi Asiyadan gələn marşrutların əlavə dəyəri nə olacaq və ya əksinə, bu dəhlizlər bir-birini necə tamamlayacaq".
Onun sözlərinə görə, Xəzər-Qara Dəniz-Avropa dəhlizinin yekunlaşmış texniki-iqtisadi əsaslandırması çox ümidverici rəqəmlər göstərib: "Avropadakı yekun çatdırılma qiyməti Avropadakı cari qiymətlərlə müqayisədə çox əlverişlidir. Məhz buna görə də növbəti mərhələdə, artıq gələn aylardan başlayaraq potensial yekun investisiya qərarına (FID) hazırlaşmaq üçün potensial maraqlı tərəflər və beynəlxalq maliyyə institutları (IFI) ilə danışıqlara başlayacağıq. Əlavə layihələrimizi də dəstəkləyəcək Mərkəzi Asiya Transxəzər interkonnektoru layihəsi üçün də gələn ildən başlayaraq eyni proses aparılacaq".
O. Zeynalov əlavə edib ki, Azərbaycan-Türkiyə layihəsinə gəlincə, BCG və TÜBİTAK tərəfindən texniki-iqtisadi əsaslandırma yekunlaşdırılıb: "Biz bu layihənin detallarını müzakirə etmək üçün özəl konsorsiumlarla təmaslaşırıq. Bu layihənin həm də siyasi təsiri var. Layihə nəticə etibarilə Azərbaycanın əsas ərazisini Naxçıvan regionu ilə birləşdirməli və daha sonra Türkiyəyə 1 giqavatlıq elektrik enerjisi ixracını təmin etməlidir".
Bizi Sosial Şəbəkələrdə İzləyin
Ən son xəbərlərdən anında xəbərdar olun.
