Hüquqinfo.az bildirir ki,
BEMM-in Sədri, Hüquq Elmləri Doktoru, Professor, Hüquq Müdafiəçisi Hacı Xaliq Bəşərə və BEMM-in dəyərli kollektivinə!
Bu gün düz 20 ildir ki, babam aramızda görünmür...
20 il... Dilə gətirəndə sadəcə bir rəqəm kimi səslənir, amma arxasında nə qədər böyük bir zaman, nə qədər dəyişən həyat, nə qədər yarım qalan xatirə var...
Babam dünyasını dəyişəndə mən hələ 1-ci sinfə gedirdim. Həyatı yenicə tanımağa başlayan balaca bir uşaq idim. O zaman ölümün nə olduğunu, bir insanın gedib bir daha geri qayıtmamasının nə demək olduğunu dərk etmirdim. Bəlkə də elə buna görə onun yoxluğunun böyüklüyünü illər keçdikcə daha çox hiss etdim.
Mən böyüdüm, illər bir-birini əvəz etdi, uşaqlığım geridə qaldı. Həyatımda çox şey dəyişdi, amma sən mənim yaddaşımda həmişə uşaqlığımın ən doğma simalarından biri olaraq qaldın, əziz babam!
İndi düşünəndə insanın ürəyindən nə qədər “kaş” keçir... Kaş səni daha çox xatırlayacaq yaşda olaydım. Kaş səninlə daha çox vaxt keçirəydim. Kaş səsini, baxışlarını, söhbətlərini yaddaşıma daha möhkəm həkk edəydim. Kaş böyüdüyümü görəydin... Kaş bu gün qarşında oturub sənə həyatımda baş verənləri danışa biləydim. Kaş bircə dəfə də olsa əlindən tutub “baba” deyə biləydim...
İnsan uşaq olanda yanında olan doğmalarının bir gün sadəcə xatirəyə çevriləcəyini düşünmür. Böyüdükcə isə anlayır ki, bəzi insanların yoxluğu illərlə keçmir. Sadəcə, insan o yoxluqla yaşamağı öyrənir.
Zaman çox şeyi dəyişdirə bilir, amma doğma insanların ürəyimizdə qoyduğu izi silə bilmir. Bəzən illər keçdikcə xatirələr azalır, amma həsrət daha da böyüyür. Çünki yaş artdıqca insan itirdiyi şəxsin həyatındakı yerini daha yaxşı anlayır.
Bu gün səni böyük həsrətlə, sevgi və rəhmətlə yad edirəm. Aradan 20 il keçsə də, sən unudulmadın. Səni tanıyanların xatirəsində, səni sevənlərin qəlbində yaşamağa davam edirsən. Əziz xatirən daim qəlbimizdə yaşayacaq.
Uca Allah sənə rəhmət etsin, məkanın Cənnət olsun. Amin!
Dərin hörmətlə:
Böyük nəvən Ülvi Bəşər
