Ukrayna ordusu Rusiyada iki neft emalı zavodunu vurub

Hüquqinfo.az bildirir ki,

Ukrayna Müdafiə Qüvvələri Rusiyanın Ufa və Samara şəhərlərində yerləşən iki neft emalı zavoduna zərbələr endirdiyini açıqlayıb.

Hüquqinfo.az xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Bildirilib ki, sentyabrın 22-nə keçən gecə Ukrayna Müdafiə Qüvvələrinin bölmələri Başqırdıstan Respublikasının Ufa şəhərində yerləşən “Başneft-UNPZ” neft emalı zavodunu vurub. Zərbədən sonra müəssisənin ərazisində yanğın baş verdiyi qeyd olunub.

Məlumata görə, zavod ildə təxminən 7,5 milyon ton neft emal etmək gücünə malikdir. Müəssisədə benzin, dizel və qazan yanacağı, mayeləşdirilmiş qaz, kükürd və digər neft məhsulları istehsal olunur.

Ukrayna tərəfinin məlumatına görə, hücuma məruz qalan digər obyekt Samara vilayətinin Samara şəhərində yerləşən Kuybışev neft emalı zavodu olub. Müəssisənin ərazisində də yanğın qeydə alınıb.

Qeyd olunub ki, “Kuybışev” neft emalı zavodu “Rosneft” şirkətinin strukturuna daxildir və Samara vilayətinin ən iri neft emalı müəssisələrindən biridir. Zavodun illik neft emalı gücü təxminən 7 milyon ton təşkil edir. Müəssisədə benzin, dizel yanacağı, mazut və 30-dan çox digər neft məhsulu istehsal olunur.