Səfir: Slovakiya və Azərbaycan qaz tədarükü sahəsində uzunmüddətli həllər axtarır

Hüquqinfo.az bildirir ki,

Slovakiya və Azərbaycan enerji sahəsində əməkdaşlığın genişləndirilməsi üzərində işləyir.

"Hüquqinfo.az" xəbər verir ki, bu barədə Slovakiyanın Azərbaycandakı səfiri Elçin Qasımov ölkənin Konstitusiya Günü və Silahlı Qüvvələr Gününə həsr olunmuş tədbirdə bildirib.

"Azərbaycan daha əvvəl enerji böhranı zamanı Slovakiyaya təbii qaz tədarük etməyə hazır olduğunu nümayiş etdirərək həmrəyliyini göstərib. Biz birlikdə gələcək üçün sabit və uzunmüddətli həll yollarının tapılması üzərində çalışırıq", - o qeyd edib.

E. Qasımov həmçinin Slovakiya şirkətlərinin Azərbaycanın işğaldan azad edilmiş ərazilərinin bərpasında iştirakından danışıb.

"Biz Slovakiya şirkətlərinin postmünaqişə regionlarının bərpasında, xüsusən də Baş Qərvənddəki "Ağıllı kənd" layihəsində və general Milan Rastislav Ştefanikin adını daşıyacaq məktəbin tikintisində fəal iştirakı ilə fəxr edirik", - səfir deyib.

O qeyd edib ki, bu layihələr sayəsində Azərbaycan ərazisində Slovakiyanın uzunmüddətli iştirakı və irsi formalaşır.

Diplomat həmçinin bildirib ki, yaxın vaxtlarda iki ölkə arasında birbaşa hava əlaqəsi yaradılacaq.

"Bu, ölkələrimizi daha da yaxınlaşdıracaq, insanlar, biznes və tələbələr arasında əlaqələrin inkişafına kömək edəcək", – o əlavə edib.