Hüquqinfo.az bildirir ki,
İtaliyanın Baş naziri Corcia Meloninin rəhbərlik etdiyi sağçı koalisiya hökuməti məktəblərdə xarici şagirdlərin sayını məhdudlaşdıran və niqabı qadağan edən qaydanı təsdiqləyib.
“Hüquqinfo.az” xəbər verir ki, Meloninin sədrliyi ilə keçirilən Nazirlər Şurasının iclasında təsdiqlənən qaydaya əsasən, İtaliya vətəndaşı olmayan, ölkədə doğulmayan və ya ən azı iki il uşaq bağçasına getməyən şagirdlərin ibtidai məktəblərin birinci siniflərində sayı sinifdəki şagirdlərin ümumi sayının 30 faizini keçə bilməz.
Orta məktəb və liseylərin birinci siniflərində isə 30 faizlik məhdudiyyət İtaliya vətəndaşı olmayan və milli təhsil sistemində ən azı üç tədris ilini uğurla başa vurmayan şagirdlərə şamil ediləcək.
Qaydaya əsasən, şəxsiyyətin müəyyənləşdirilməsinə mane olan niqab kimi üz örtüklərindən istifadə, xüsusi sağlamlıq və ya təhlükəsizlik səbəbləri istisna olmaqla, qadağan ediləcək. Tələbləri pozan şəxslər 1000 avroyadək cərimələnə bilərlər.
Təhsil naziri Cüzeppe Valditara Nazirlər Şurasının iclasından sonra keçirdiyi mətbuat konfransında bu addımın italyan dilinin öyrənilməsi və inteqrasiya baxımından əhəmiyyətli olduğunu bildirib.
Valditara məktəblərdə inklüzivliklə bağlı ciddi problemlər olduğu halda valideynlərin italyan dilini öyrənməsinin təşviq ediləcəyini deyib. Onun sözlərinə görə, məktəblər bu vəziyyət barədə sosial xidmətlərə məlumat verməli, sosial xidmətlər isə valideynlərin italyan dili kurslarına cəlb olunmasına kömək etməlidir. Nazir kursu başa vurmayan valideynlər üçün 200-1000 avro arasında cərimə nəzərdə tutulduğunu bildirib.
İtaliya Prezidenti Sercio Mattarella da həftə ərzində müzakirə olunan qayda ilə bağlı narahatlığını ifadə edərək, “Məktəblər hər kəs üçün açıq olmalıdır” deyib.
Qaydanın qanuna çevrilməsi üçün onun həm Senat, həm də Deputatlar Palatasında müzakirə edilərək təsdiqlənməsi tələb olunur.
